ភ្នំពេញ៖ ក្រសួងអប់រំ យុវជន និងកីឡាជូនដំណឹងដល់បណ្តាប្រធានមន្ទីរអប់រំ យុវជន និងកីឡា តាមបណ្តារាជធានី ខេត្ត និងនាយកគ្រឹះស្ថានឧត្តមសិក្សាសាធារណ: និងឯកជន នៅថ្ងៃទី២៣ ខែមីនា ឆ្នាំ២០២៣ ស្តីពីការឈប់សម្រាកក្នុងអំឡុងពេលនៃព្រឹត្តិការណ៍ប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២។

ក្រសួងការណែនាំដល់គ្រឹះស្ថានអប់រំកុមារតូច និងសេវាអប់រំកុមារតូច គ្រឹះស្ថានបឋមសិក្សាគ្រឹះស្ថានមធ្យមសិក្សាចំណេះទូទៅ គ្រឹះស្ថានមធ្យមសិក្សាចំណេះទូទៅ និងអប់រំបច្ចេកទេស ផ្នែកសាធារណៈទាំងអស់ ត្រូវអនុវត្តវិស្សមកាល ចាប់ពីថ្ងៃទី ២០ ខែមេសា ឆ្នាំ២០២៣ ដល់ថ្ងៃទី ១៨ ខែឧសភា ឆ្នាំ២០២៣។

ចំពោះគ្រឹះស្ថានអប់រំកុមារតូច និងសេវាអប់រំកុមារតូច គ្រឹះស្ថានបឋមសិក្សា គ្រឹះស្ថានមធ្យមសិក្សាចំណេះទូទៅ ផ្នែកឯកជនទាំងអស់ ត្រូវឈប់សម្រាកចាប់ពីថ្ងៃទី២០ ខែមេសា ឆ្នាំ២០២៣ ដល់ថ្ងៃទី១៨ ខែឧសភា ឆ្នាំ២០២៣។ ដោយឡែក គ្រឹះស្ថានឧត្តមសិក្សាទាំងសាធារណៈនិងឯកជន ក៏នឹងត្រូវឈប់សម្រាក ចាប់ពីថ្ងៃទី២០ ខែមេសា ឆ្នាំ២០២៣ ដល់ថ្ងៃទី១៨ ខែឧសភា ឆ្នាំ២០២៣ ផងដែរ។

ក្រសួងអប់រំ យុវជន និងកីឡា បញ្ជាក់ថា កម្ពុជានឹងធ្វើជាម្ចាស់ផ្ទះនៃការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលនឹងប្រព្រឹត្តទៅចាប់ពីថ្ងៃទី៥ ខែឧសភា ឆ្នាំ២០២៣ ដល់ ថ្ងៃទី១៧ ខែឧសភា ឆ្នាំ២០២៣ ដូចនេះក្រសួងណែនាំដល់គ្រឹះស្ថានអប់រំទាំងអស់ឱ្យអនុវត្តសេចក្តីជូនដំណឹងខាងលើ ដើម្បីចូលរួមរក្សាសណ្ដាប់ធ្នាប់ សុវត្ថិភាព និងគាំទ្រ ដល់ព្រឹត្តិការណ៍ប្រកួតកីឡានេះ៕